Wikipedia:Neutralitéit

D'Neutralitéit ass ee vun de Grondprinzippie beim Schreiwe vun Artikelen op Wikipedia. Nom engleschen Neutral Point of View gëtt dëst och dacks NPOV ofgekierzt.

Eng universell Enzyklopedie ass eng Usammlung vu "syntheeteschem" Wëssen, dat vun engem neutrale Point de vue aus presentéiert gëtt. Den Auteur soll beim Schreiwe souwäit wéi méiglech probéieren neutral ze bleiwen.

Duerch den neutrale Point de vue gëtt versicht, Iddien a Fakten esou ze presentéieren, datt souwuel d'Géigner wéi och d'Partisane mat der Beschreiwung vun den Iddien averstane sinn.

Reegele fir d'Neutralitéit

• En Artikel vun enger Enzyklopedie soll net versichen, fir de Standpunkt vum Auteur z'argumentéieren. Éischter soll ee soen, wéi eng Leit, Gruppen, Reliounen etc. dës Meenung hunn.
• Vill verschidden an och widderspréchlech Aspekter kënnen an engem Artikel behandelt ginn. Fakten a Meenunge sollen dee Moment kloer vuneneen ofgegrenzt sinn.
• All Point de vue soll neutral an an engem net-emotionalen Toun duergestallt ginn.
• Wann Dir bei engem Theema emotional involvéiert sidd, ass et eventuell besser, Dir iwwerloosst engem aneren d'Schreiwe vun der Säit. Dat bedeit ë. a. och, datt Artikelen zu Biographien net vun de betraffene Persoune selwer solle geschriwwe ginn.

Virschléi zum neutrale Point de vue

Wat ass Fakt, wat ass Bewäertung?

Als Fakten oder Tatsaache kann een Aussoe formuléieren, déi hautdesdaags bei der Allgemengheet vun de Mënschen net ëmstridde sinn. Dozou gehéieren zum Beispill d'Naturgesetzer, mathematesch Theesen oder Daten aus der Statistik (Awunnerzuel asw.).

Oppasse sollt een allerdéngs bei Aussoe wéi „De Picasso ass dee gréisste Moler vum 20. Joerhonnert“. Och wann dat vu ville Leit eventuell ugeholl gëtt, sou ass et eng Bewäertung a keng Tatsaach. An dësem Fall kéint een de Saz besser sou dréinen: „De Picasso gëtt als ee vun de gréisste Moler vum 20. Joerhonnert ugesinn“.

Meenungen a Bewäertungen (op eegen oder net) sollte wa méiglech mat Fakten ënnermauert ginn. Zum Beispill: „D'Grupp XYZ zielt zu deenen erfollegräichste vun den 80er Joren. Aleng 1985 hu si X Millioune Placke verkaaft.“

Wien denkt wat?

Bei de Standpunkten muss een och ëmmer drun denken ze soen, ween sou denkt. Amplaz also ze soen „Vill Leit hunn e Problem mat Softwarepatenter“ ass et besser ze soen „Vill Programméierer hunn e Problem mat Softwarepatenter“, well „vill Leit“ vag ass.

Onparteiesch sinn

Bei der Duerstellung vun de verschiddene Point-de-vuen heescht et onparteiesch ze sinn, also net duerch eng ausgewielt Rhetorik seng eege Meenung duerchblécken ze loossen.

Wat maachen, wann een Artikel net neutral ass?

Hei ginn et e puer Méiglechkeeten:

• Wann Dir genuch Connaissancen hutt, kënnt Dir den Artikel selwer änneren.
• Probéiert op der Diskussiounssäit vum Artikel mat der Communautéit ze diskutéieren.
• Mellt den Artikel op dëser Säit Wikipedia:Neutralitéitsproblemer an hannerloosst de Message {{Neutralitéit}} uewen op der Artikelsäit selwer:

Opgepasst: D'Neutralitéit vun dësem Artikel gëtt staark ugezweifelt.